ودااااااااااااااااع

أستاذنك بسافر أيام واجيك
وان طالت ايام السفر لا تحاتي


حتى و لو طولت ماني مخليك
ياللي بدونك وش تسوى حياتي


تامر على حاجه؟؟ باودعك واخليك
عسى عوض الأيام في المقبلاتِ


حتى يدي ما ودها تفارق يديك
ساكت وانا اشوف البلا في سكاتي


ما شفتني لا رحت منك التفت فيك
بلاي والله روحتي والتفاتي


لكن قبل ما اروح ودي أوصيك
وانت الوحيد اللي يقدر وصاتي


لاحدٍ سألك و قال لك وين مغليك
قل له لوازم لا قضاها بياتي


و أن طروا النسيان ماني بناسيك
يا راس مالي في الحياة وغناتي


و ان طروا السلوان ماني بساليك
طيفك معي حتى وانا في صلاتي


قلبي وهو قلبي إذا مر طاريك
لولا ضلوعي كان عزوا مماتي


لو جض صدري كان يمديه ياتيك
و يبات عندك ويهنا بالمباتي


أنا .. و قلبي .. و الغلا .. ساكنٍ فيك
و انته .. و قلبك .. و الغلا .. وسط ذاتي


غلاك مثل الحكم عند المماليك
أكبر طموحي .. لا .. كل أمنياتي


شف في غيابي أي حاجه تسليك
لأني بعدك أسلى مع ذكرياتي


أحاول اذكر أي شيٍ يطريك
واقول هو سوى وانا ذي سواتي


كني موادع كل شيٍ حواليك
و كني حسبت حساب حزة وفاتي


أحب لأني ما اقدر انساك و أبيك
و لا اقدر أخليك ياللي تحاتي


معنى أحبك .. و ما اقدر أنسى .. و أخليك
يعني بدونك وش تسوى حياتي